ഇ-മഹല് വാർത്തകൾ

കോഴിക്കോട്: മഹല്ലുകളിലും മദ്റസകളിലും മസ്ജിദുകളിലും മതസ്ഥാപനങ്ങളിലും സുന്നി മാനേജ്മെന്‍റ് അസോസിയേഷന്‍ (എസ്.എം.എ) സെന്‍ട്രല്‍ കമ്മിറ്റി നടപ്പില്‍ വരുത്തുന്ന സോഷ്യല്‍ ഓഡിറ്റിനു വേണ്ടി തയ്യാറാക്കിയ ഓഡിറ്റ് മാന്വല്‍ പ്രകാശനം ചെയ്തു. കോഴിക്കോട് സമസ്ത സെന്‍റര്‍ ഓഡിറ്റോറിയത്തില്‍ നടന്ന ചടങ്ങില്‍ സമസ്ത കേരള ജംഇയ്യത്തുല്‍ ഉലമാ ജനറല്‍ സെക്രട്ടറി കാന്തപുരം എ.പി അബൂബക്കര്‍ മുസ്ലിയാര്‍, കേരള മുസ്ലിം ജമാഅത്ത് സംസ്ഥാന ജനറല്‍ സെക്രട്ടറി സയ്യിദ് ഇബ്രാഹിം ഖലീലുല്‍ ബുഖാരി തങ്ങള്‍ക്ക് കോപ്പി നല്‍കി പ്രകാശനം നിര്‍വഹിച്ചു. 

സമസ്ത പ്രസിഡണ്ട് ഇ. സുലൈമാന്‍ മുസ്ലിയാര്‍, കുമ്പോല്‍ സയ്യിദ് ആറ്റക്കോയ തങ്ങള്‍, സയ്യിദ് ഹാമിദ് കോയമ്മ തങ്ങള്‍ മാട്ടൂല്‍, സയ്യിദ് ശറഫുദ്ദീന്‍ ജമലുല്ലൈലി തങ്ങള്‍, പൊന്മള അബ്ദുല്‍ ഖാദിര്‍ മുസ്ലിയാര്‍, എ.പി. മുഹമ്മദ് മുസ്ലിയാര്‍ കാന്തപുരം, കെ.കെ. അഹമ്മദ്കുട്ടി മുസ്ലിയാര്‍ കട്ടിപ്പാറ, പേരോട് അബ്ദുറഹ്മാന്‍ സഖാഫി, തെന്നല അബൂഹനീഫല്‍ ഫൈസി, പ്രൊഫ. കെ.എം.എ റഹീം, ഇ. യഅ്ഖൂബ് ഫൈസി, സുലൈമാന്‍ സഖാഫി കുഞ്ഞുകുളം തുടങ്ങിയവര്‍ സംബന്ധിച്ചു.

മഹല്ല്, സ്ഥാപന കമ്മിറ്റികള്‍ നടപ്പിലാക്കിയ പദ്ധതികളുടെ പ്രകടനങ്ങള്‍ വിലയിരുത്തുന്നതിന്നും, അംഗങ്ങള്‍ക്ക് അവയെ വിലയിരുത്താനുള്ള അവസരം നല്‍കുന്നതിനുള്ള രീതിശാസ്ത്രവും, വരും കാലത്തേക്കുള്ള വികസന രേഖയുമായ സോഷ്യല്‍ ഓഡിറ്റ് സംസ്ഥാനത്ത് എസ്.എം.എയില്‍ രജിസ്റ്റര്‍ ചെയ്ത മുഴുവന്‍ മഹല്ല് ജമാഅത്തുകളിലും മസ്ജിദ് മദ്റസ മത സ്ഥാപനങ്ങളിലും നടപ്പിലാക്കുകയാണ്. ആസൂത്രണത്തിലും നടപ്പാക്കലിലുമുള്ള വിശ്വാസ്യത, സുതാര്യത, പങ്കാളിത്തം, ഉത്തരവാദിത്വം, കൂടിയാലോചന തുടങ്ങിയ ജനാധിപത്യത്തിന്‍റെ അടിസ്ഥാന അവകാശങ്ങള്‍ മഹല്ല്, സ്ഥാപനവത്കരിക്കുക എന്നതാണ് ഇതുകൊണ്ടുദ്ദേശിക്കുന്നത്. സാമൂഹിക ലക്ഷ്യങ്ങള്‍ക്കായി വിഭവങ്ങള്‍ എങ്ങനെ ഉപയോഗിക്കപ്പെട്ടു എന്നതും, ഉദ്ദേശ്യ ലക്ഷ്യങ്ങള്‍ക്കനുസരിച്ച് മഹല്ല്, സ്ഥാപനം എത്രത്തോളം വളര്‍ന്നിട്ടുണ്ടെന്ന് കണ്ടുപിടിക്കുന്നതിനും, സ്ഥാപനത്തിന്‍റെ സാമ്പത്തികേതര ലക്ഷ്യങ്ങളെ കൃത്യവും ചിട്ടയോടുകൂടിയുള്ള വിശകലനവും വഴി കണ്ടെത്തുന്നതിനും സോഷ്യല്‍ ഓഡിറ്റ് സഹായിക്കും.

സെന്‍ട്രല്‍ കമ്മിറ്റി പ്രസിദ്ധീകരിച്ച മാന്വല്‍ അനുസരിച്ച് റീജ്യണല്‍ സിജിയാണ് (ക്രിയേറ്റീവ് ഗ്രൂപ്പ്) സോഷ്യല്‍ ഓഡിറ്റ് പ്രക്രിയ നിര്‍വഹിക്കേണ്ടത്. റീജ്യണല്‍ സെക്രട്ടറി ചെയര്‍മാനും ഒഫീഷ്യല്‍ അസിസ്റ്റന്‍റ് കണ്‍വീനറും വിദ്യാഭ്യാസ പ്രവര്‍ത്തകന്‍, സാമൂഹ്യ പ്രവര്‍ത്തകന്‍, പണ്ഡിതന്‍ എന്നിവര്‍ അംഗങ്ങളുമായ സിജി മെമ്പര്‍മാര്‍ക്ക് അടുത്ത മാസം ജില്ലാ തലത്തില്‍ നടക്കുന്ന പരിശീലന ക്യാമ്പില്‍ വെച്ച് മാന്വല്‍ വിതരണം ചെയ്യും.